Kanol an Hañv
Miliadoù a dud a oa e Naoned d'an 18 a viz Mezheven. Embann a raent, ur wech c'hoazh, o youl da welet Breizh adunanet.
Doareoù a bep seurt zo da startaat al liammoù zo etre an holl vroioù a ya d'ober Breizh.
Ober ton da Ganol Naoned-Brest zo unan anezho. 200vet deiz-ha-bloaz ar ganol zo un digarez a-feson da c'houzout hiroc'h diwar he fenn.
Ul liamm etre gorre ha goueled ar vro ez eo. Un digarez ouzhpenn da Rannvro Breizh ha da zepartamant al Liger-Atlantel da genlabourat.
Dre m'eo erru amzer ar vakañsoù e pedomp ac'hanoc'h en niverenn-mañ d'ober gwelloc'h anaoudegezh gant Istor ar ganol ha da zizoleiñ ar pezh a vo aozet a-hed an hañv. Hag ur bern traoù a vo ! Peadra da cheñch un tamm eus an holl festivalioù a vo dre-holl. Un dibab anezho hon eus graet memes tra kement ha reiñ da c'houzout ar pezh a ginnig ar re bouezusañ anezho.
Boued founnus ha liesseurt a gavoc'h en niverenn-mañ. Emgav a roomp deoc'h e Gwengolo evit ur bloavezhiad all a geleier hag a zudi.
Vakañsoù mat deoc'h-holl !
